၀ီရသူ

“ပထမဆုရ ရိုးရာ(ဂန္ထဝင်)ကဗျာ”

ကဗျာအမည် – သူ့ Dictionary
ကဗျာဆရာ – သာကီနွယ်(နတ်မောက်)
ရမှတ် – (၃၇)မှတ်
—————————————–

“သူ့ DICTIONARY”

=DICTIONARYသူသည်
တိုင်းပြည်ဆွဲလိပ် ၊ ကျွန်တံဆိပ်ဖြင့်
ခပ်နှိပ်လေရာ ၊ ထိုအခါ၌
ဘာသာလူမျိုး ၊ တိုင်းပြည်ကျိုးကို
မြတ်နိုးနှစ်သက် ၊ ရင်ဖြင့်ဆက်၍
အသက်ကိုချွတ် ၊ သတ္တိဆွတ်လျှက်
တိုက်ပွတ်ဆေးသုတ် ၊ ကျွန်နံ့ရုတ်သည့်
ဦးဥတ္တမ ၊ နှလုံးလှကို
လုံးဝမိတ္တူ ဆွဲခဲ့သူ။

သူသည်
ဗုဒ္ဓမြတ်စွာ ၊ သာသနာကို
ရှည်ကြာလေးမြင့် ၊ အနေတင့်ဖို့
ဆင့်ဆင့်ကြိုးပမ်း ၊ လရောင်ထမ်း၍
ငြိမ်းချမ်းရေးစိတ် ၊ အပြည့်သိပ်လျှက်
မိုးမိတ်ကျောက်စာ ၊ အလွှာလွှာကို
အစာဟုညွှန်း ၊ ဘုဉ်းပေးလွန်းသည့်
မင်းကွန်းဆရာ ၊ မြောက်များစွာကို
ကိုယ်မှာသန္ဓေ လွယ်ထားသူ။

သူသည်
အမှန်တရား ၊ သစ္စာမြားကြောင့်
အများမဲ့ရွဲ့ ၊ ဆိုကဲ့ရဲ့လည်း
မဖဲ့မစောင်း ၊ သူ့လမ်းကြောင်းသည်
မပြောင်းမပြို ၊ တိုင်းပြည်အိုတွက်
ထောင်ကိုသူ့ကျောင်း အောက်မေ့သူ။

သူသည်
ဘုရားရင်ခွင် ၊ သေးပေါက်ဝင်သည့်
ထေရ်ရှင်ထေရ်ကြီး ၊ အသီးသီးနှင့်
အမြှီးလည်းရမ်း ၊ သမီးထမ်းလျှက်
လက်ကြမ်းနှင့်ကုပ် ၊ သွေးကိုစုပ်၍
မျိုးပုပ်စပ်ဖျော် ၊ ရန်စဖော်သည့်
ကျူးကျော်နယ်ချဲ့ ၊ ခွေးတစ်ဖွဲ့တွက်
မနွဲ့မကြောင် ၊ သူ့ကလောင်ကို
ပြောင်ပြောင်မြောက်မြောက် ၊ မီးနှင့်ပေါက်သည့်
အမြောက်တစ်လက် ဖြစ်စေသူ။

သူသည်
ဗုဒ္ဓဘာသာ ၊ သာသနာကို
ရောင်ဝါညှိုးနွမ်း ၊ သရေခမ်းအောင်
ပြုစွမ်းဆောင်လစ် ၊ မိစ္ဆာညစ်တွက်
အုတ်မြစ်ခိုင်ခိုင် ၊ နှလုံးစိုင်ဖြင့်
မယိုင်မတွန့် ၊ မကြောက်ရွံ့ပဲ
သက်စွန့်ချိုးချ ၊ မင်းဒုဋ္ဌသို့
ဘဝပီပီ ၊ သွးနီနီဖြင့်
ရေးသီ သမိုင်းထိုးခဲ့သူ။

သူသည်
ဉာဏ်ကန်းတို့ငြမ်း ၊ ခယောင်းလမ်းဝယ်
မြေစမ်းပြီးနောက် ၊ ခရမ်းပေါက်ဖို့
မကြောက်မရွံ့ ၊ နောက်မတွန့်သည့်
ရဲဝံ့ကြွကြွ ၊ မင်းဒုဋ္ဌ၏
အဘယလောင်းလျာ ဖြစ်ပေ၏။

သူသည်
မလိုမဲ့ရွဲ့၊ ဆိုကဲ့ရဲ့လည်း
မနွဲ့မရွံ့၊ နောက်မတွန့်ပဲ
ရဲဝံ့လမ်းကြောင်း ၊ ကြံ့ဦးခေါင်းသို့
မစောင်းမနွမ်း ၊ ခယောင်းလမ်းဝယ်
လန်းလန်းစွင့်စွင့် ၊ တလွင့်လွင့်နှင့်
ဆန်းတင့်မျိုးစောင့် ၊ ပျိုးစေ့တောင့်ကို
မကြောင့်မကြ ၊ သူလျှင်ချ၍
ဘဝကိုချိုး ၊ သူလျှင်ပျိုးကာ
စည်းရိုးမထိုး ၊ တို့အမျိုးတွက်
စနိုးစနောင့် ၊ စိတ်မဖြောင့်သည့်
မျိုးစောင့်တာဝန် ၊ သူ့ဝတ်မွန်ကို
ကျေပွန်စွာပင် ထမ်းဆောင်သူ။

သူသည်
မြတ်ရှင်ဘာသာ ၊ သာသနာနှင့်
မြန်မာလူမျိုး ၊ ပြည်အကျိုးတွက်
တန်ခိုးအာဏာ ၊ မကိုးပါပဲ
သစ္စာတစ်ခု ၊ လက်နက်ပြု၍
အန်တုတွန်းလှန် ၊ ပြည်သူကန်လည်း
နောင်ပြန်မပုန်း ၊ သူ့အပြုံးဖြင့်
အမုန်းတွေကို နမ်းခဲ့သူ။

သူသည်
မြန်မာမင်းသား ၊ ထူးချွန်ငြား၍
ရွှေသားရုပ်လှ ၊ လက်ခံရဖို့
ဒေါသထွက်ယောင် ၊ ရိုက်နှက်ယောင်နှင့်
မိုက်ယောင်လည်းပြု ၊ ပီပြင်မှုကြောင့်
မုန်းလုရန်ဖွဲ့ ၊ ဆဲဆိုခဲ့လည်း
မပဲ့အပြုံး ၊ မေတ္တာသုံး၍
မရှုံးသူ့လမ်း ၊ ဇာတ်ဝင်ခန်းသည်
လူကြမ်းမင်းသား အံ့ကျော်ပေါ့။

သာကီနွယ် နတ်မောက်