ဝီရသူ

တန်ဆောင်မုန်းလဆန်း(၈)ရက် 27.10.2017 ရက်နေ့မှာ ကျင်းပပါတယ်။ မန္တလေး မဟာအောင်မြေမြို့နယ် မစိုးရိမ်တိုက်သစ် ဓမ္မမဟိဒ္ဓိကျောင်းတော်ကြီးမှာ ကျင်းပတာပါ။ မစိုးရိမ်တိုက်သစ် ဝါဆိုသံဃာ ၂၅၀၀ ကျော်အား ကထိန်သင်္ကန်းကပ်လှူပွဲဖြစ်ပါတယ်။

ကထိန်ဒကာကတော့ မန္တလေး ပြည့်ကြီးတံခွန်မြို့နယ် စက်မှု(၁) လုပ်ငန်းရှင် ပြည်သူများဖြစ်ပါတယ်။ မနက်ပိုင်းမှာ စာသင်သံဃာတော်များအား ဆွမ်းဆက်ကပ်ပါတယ်။ ၄င်းနောက် စာချဆရာတော်များ စာသင်တန်းအောင်သံဃာများ နာယကဆရာတော်များအား နေ့ဆွမ်းဆက်ကပ်ပါတယ်။

မွန်းလွဲ ၁း၀၀ နာရီမှာတော့ ကထိန်သင်္ကန်းကပ်လှူသည့်အခမ်းအနား ကျင်းပပါတယ်။ မဟာနာယကဆရာတော်ကြီး ဘဒ္ဒန္တကေသရာဘိဝံသက ကထိန်အနုမောဒနာတရား ဟောကြားပြီး ရေစက်ချ အမျှဝေကြပါတယ်။ ညနေ ၃း၀၀ နာရီမှာတော့ ကထိန်ခင်းကြပါတယ်။

ကထိန်ခံဆရာတော်နှင့် နာယကဆရာတော်များ သိမ်ထဲမှာ ကံဆောင်နေစဉ် မဟာနာယကဆရာတော်ကြီး ဘဒ္ဒန္တကေသရာဘိဝံသက သံဃာများအား သြဝါဒပေးပါတယ်။ ကထိန်ကံဆောင်ပြီး နာယကဆရာတော်များ အခမ်းအနားသို့ ပြန်ကြွလာသည့်အခါ ကထိန်ခံဆရာတော်က ပါဠိလို ကထိန်ခင်းပါတယ်။ မဟာနာယကဆရာတော်ကြီးနှင့် နာယကဆရာတော်များက တစ်ပါးချင်းစီ အနုမောဒနာပြုကြပါတယ်။ ၄င်းနောက် သံဃာများက အနုမောဒနာပြုကြပါတယ်။

အခမ်းအနားအပြီးမှာတော့ ပဒေသာပင်များကို သံဃာများအား မျှဝေလှူဒါန်းဖို့ ခွဲခြမ်း ပိုင်းခြားကြပါတယ်။ ပဒေသာပင်ပေါင်း ၂၀၀ ကျော်မှ ရရှိသော လှူဖွယ်ဝတ္ထုများကို စာသင်သားသံဃာတော် ၂၅၀၀ ကျော်အား မဲဖောက်လှူဒါန်းကြရတာပါ။ ပြည်ကြီးတံခွန်မြို့နယ် စက်မှု(၁)လုပ်ငန်းရှင်မိသားစု ကထိန်အလှူတော်ဟာ (၂၇)ကြိမ်မြောက် အလှူတော်ဖြစ်ပြီး နှစ်စဉ်နှစ်တိုင်း သံဃာများပြားရာ ကျောင်းတိုက်ကြီးတွေကို မဲချပြီး ကပ်လှူတာလို့ သိရပါတယ်။

ဒီနှစ် မစိုးရိမ်တိုက်သစ် ကထိန်ခင်းရာတွင် စာအောင်သံဃာတော်များ ဆုနှင်းသဘင်အတွက် ပဒေသာပင် သိန်း(၁၀၀)ကျပ် လှူဒါန်းနိုင်ခဲ့ပါတယ်။ လှူဖွယ်ဝတ္ထုအားလုံးပေါင်း သိန်း(၄၀၀)ကျော်တန်ဖိုးရှိကြောင်း သိရပါတယ်။ ဒီနှစ်အလှည့်ကျ ကထိန်ခံခွင့် ရရှိတဲ့ နာယကဆရာတော်ကတော့ ဓမ္မသီတလကျောင်း နာယကဆရာတော် ဘဒ္ဒန္တဇာနေယျာဘိဝံသ ဖြစ်ပါတယ်။